ملاحظات علي المنور

اتفقنا انه مش تخصصك كمهندس مدني بس وعدناك اننا هنخليك متميز فيها بجانب تخصصك

💪

في البوست اللي فات اتكلمنا عن مكان السلم وانه لازم
- يكون في منطقه ميته من الشقه عشان ميهدرش مساحه
- ميكونش علي الواجهه عشان مضيعش واجهتي ف السلم واعمل الاوض علي مناور
و قولنا ان انسب مكان ليه يكون ب يمس الجارين لو الدور عندي شقه واحده
لكن لو الدور شقتين ف يفضل ان السلم يكون في منتصف الأرض و يمس جار واحد فقط .

🤨

المرة دي هنتكلم عن جزء مهم جدا بردو هو #المناور
- ازاي احدد مكان المنور
- عدد المناور اللي ممكن اعملها في الشقه عشان توفرلي تهوية كويسه و
كمان اقدر امشي مواسير المطبخ والحمام فيها
بالعقل يعني .. ليه اشوه الواجهه ف شكل مواسير لما ممكن ف ايدي احطهم ف المنور !!!

🤔

* أول حاجه اوعي .. اوعي كمان مره اشوفك عامل المنور علي الواجهه !!
متستغربش من كدا في البيوت القديمه كنا بنلاقي مساقط الحمامات علي الشارع و دا طبعا غير مفضل من كذا جانب : ...
- لو اتكلمنا من ناحيه المعماري ف انت كدا بتقلل المساحه المتاحه من الغرف علي الواجهه و بالتالي ممكن تهوية اوضه تكون مش كويسه او تقلل من بعدها اللي علي الواجهه .

- ولو اتكلمنا من ناحيه الخصوصية ف طبعا غير مفضل ابدا ان يكون مثلا المنور بتاع الحمام علي الشارع عشان كدا عامل مهم جدا بيحكمنا في التقسيم المعماري و هو الخصوصية و هنجيب سيرته كتير في الكلام الجاي ركز معايا بقى ...

🏃‍♂️

* تاني حاجه يفضل وضع منور بجوار السلم لتهوية السلم و يكون له اضاءه طبيعيه و لازم يكون ابعاده مناسبه عشان التهوية تكون جيده و يعمل انارة طبيعيه للسلم في الادوار السفليه في فترة الصبح .

🤔

* المنطقه بتاعتك من الأرض الملامسه للجار هي منطقه ميته بالنسبالك مش هتعرف تستفيد منها باي تهوية للغرف و ممكن الأرض تكون غير منتظمه أصلا في المنطقه دي ف الحل انك بتعمل المنور جنب الجار بحيث انك تقلل المنطقه الغير مفيدة و كمان تساعد في عمل انتظام لابعاد الشقه بتاعتك عشان الغرف تكون مظبوطه.

😉

* وكمان في الأبراج المرتفعه المنور عامل مهم جدا لاننا بنستخدمه اكتر من استخدام زي مثلا التهوية الطبيعيه للمبني من خلال انه بيخزن الهوا البارد من ساعات الليل و في النهار بيعمل علي ترطيب الجو و انخفاض الحرارة بداخله ولانه متصل بالسلم و بالمطبخ و الحمام ف دا بيديهم تهوية كويسه بردو .

👌

الاستخدام الأساسي للمنور هو عشان مواسير الصرف بتاعه المطبخ و الحمام ف بالتالي لازم أي مطبخ او حمام اعمل جنبه مسقط حتي و لو صغير و عشان كدا يفضل عمل المطبخ و الحمام جنب بعض و يفضل أيضا لو جنب السلم عشان يكون منور واحد كبير يعمل تهوية كويسة و المواسير تمشي فيه و كمان من غير ما اقلل مساحه الشقه كتير .

طب ييجي واحد يقولي ممكن اعمل حمام صغير في اوضة النوم اقولة اه لو المساحه عنك كويسه ممكن جدا و تعمله منور صغير خاص بيه بردو طب لو الحمام دا قريب من الحمام الرئيسي بتاع الشقه ممكن معملش منور اقولك اه بس هتعلي منسوب التشطيب عشان هتمشي المواسير من تحت السيراميك ودا حل مش كويس منصحكش بيه

😉

ملاحظه مهمه جدا بردو هي ان ممكن تعمل منور مشترك مع الجار بتاعك بمعني احنا اتفقنا ان المنور بيكون جنب الجار و لو انت مش عايز تعمل مساحته كبيره او عايز تكون التهوية اللي جايه منه اكبر ب تتفق مع الجار و ممكن تعمله المنور في نفس المكان بحيث انه يكون مشترك بينكم والطرفين يستفادوا